Unang Tula: "Muling Pagbalik"

Kay hirap gumawa ng tula

Nang hindi mo alam kung ano ba ang nais ipadama

Ni hindi ko nga alam kung ano bang gagawing paksa

Pero ang gusto ko lang, maibahagi ang aming istorya.

Saya, yan ang unang naranasan nang Siya ay makilala

Sayang di mabatid, sayang di maipaliwanag

Kasiyahang alam mong Siya lang ang makapagbibigay

Kasiyahang nais mong maranasan pang habang buhay.

Sa tuwing kinakausap ko Siya, talagang mapapangiti na lang ako

Yung ngiting magkabilang tainga ang abot, At sa mukha'y tila ba nakapako

Lahat ng pangangailangan ko, ibinigay Niya

Tuwa, aruga, at syempre ang walang kapantay na pagmamahal na nagmumula sa Kaniya.

Kinalaunan, tila ba nagiba ang ihip ng hangin

Tila ba unti-unti nang nanlabo ang pagtingin

Sapagkat damdamin ko'y nag-iba ang naisin

Mga naisin na hindi Mo nakaplanong ibigay, kaya't napagdesisyunan kong ang piling Mo'y lisanin.

Iyong naranasan mula sa akin ang pait

Ang isinukli ko sa bawat pagmamahal na iyong ibinigay ay sakit

Ngunit kahit sa kabila ng aking nagawa, sabi Mo'y sa puso Mo ako'y walang kapalit

Pero ang ginawa ko'y iniwan ka at laman ng puso'y hindi na Ikaw, pinagpalit.

Iba ang kapiling, ngunit Ikaw ang nasa isip

Napagtanto na tama ang kasabihan, na nasa huli ang pagsisisi

Dahil sinayang ko ang kaisa-isang nagmamahal sa akin ng tunay

Sinayang ko ang kaisa-isang nagbigay kulay sa aking buhay.

Kaya naman muling bumalik, sinusubukang bumalik

Tumatakbong pabalik, ngunit natigilan at napaisip

May babalikan pa ba ako?

O sinukuan Mo na ako at pag-ibig sa akin ay tuluyan nang naglaho?

Napapikit ng mariin

Ano na nga bang gagawin?

Ngayon wala nang nagmamahal sa akin

Na tulad mong tapat at walang alanganin.

Pero may bigla akong nadinig

Na tila ba pag-asa at pangalawang pagkakataon ang dala nitong tinig

Naghanap-hanap ako kung saan ba nanggagaling

At doon nakita Ka, nakatayo, naghihintay.

Tumakbo ako papunta sa Iyo

At isang malaking yakap ang pinansalubong Mo

"Ama, patawad dahil tinalikuran kita, patawad at ang atensyon ko'y nabaling sa iba, patawad at kinalimutan kita, patawad dahil iniwan kita"

Katagang aking nabanggit habang sa Iyo ako'y nakayakap ng mahigpit

Muli kang bumigkas, at sinabi

"Anak, pinapatawad na kita, narito lang naman Ako, nagbabantay, nag-iintay sa'yo, salamat at muli kang bumalik, huwag na huwag ka nang kakawala sa yakap ng aking bisig"

Ako'y napaluha, at sa Iyo'y napakapit

Sa aking pagbabalik, sa bisig mo'y di na kakawala pa

Sa aking pagbabalik, sisiguraduhing Ikaw lang ang paghahariin sa puso at buhay, wala nang iba pa

Sa aking pagbabalik, ang itatatak sa isipan ay Ikaw lamang Ama

Sa aking pagbabalik, sa piling Mo'y hindi na babalaking lilinasin pa.